ပြဿဒါး ဟူသည်




နေ့ ရက်ဟူသည် သတ်မှတ်ချက်မျှသာ ဖြစ်ပါသည်။ ရက်သက်သက်သည် ရာဇာလည်းမဟုတ်။ ဒွန်းစဏ္ဍားလည်း မဟုတ်ပါ။လူသားတစ်ဦးအဖို့ အခါကောင်း ဟူသည်မှာ သုစရိုက်ပြုကျင့်သောအချိန်သာ ဖြစ်ပါ၏။ အခါဆိုးဟူသည်မှာ ဒုစရိုက်ပြုကျင့်သောအချိန်သာ ဖြစ်ပါ၏။ 
ဝေဒကျမ်းက ပြဿဒါးနေ့ ဟု သတ်မှတ်သောနေ့ တွင်ပင် ကံကောင်းကြုံသူ၊ အခါကောင်းကြုံသူ အများအပြား ရှိပါ၏ ။ ထိုသူများပြုသည့် ကောင်းမှု၏အကျိုးကို ကမ္မနိယာမ အားလျော်စွာ ခံစားကြရခြင်းသာ ဖြစ်၏။ ကုသိုလ်ကံ၊ အကုသိုလ်ကံ၏ အကျိုးပေးနိုင်မှုသည် အချိန်တန်လျှင် အကျိုးပေးသည်သာ ဖြစ်ပါ၏။ အာသဝေါ မကုန်ခန်းသေးသည့် ဘာသာခြား ဗြဟ္မဏပုဏ္ဏားများ သတ်မှတ်ထားသည့် ရက်ရာဇာ၊ ပြဿဒါး ဟူသည်ကို ထေရဝါဒ ဗုဒ္ဓဘာသာဝင်များအနေဖြင့် အရေးစိုက်နေစရာ မလိုပါချေ။ ဤသည်နှင့် စပ်လျဉ်း၍ နမ္မားဆရာတော်ကြီး အရှင်ဉာဏ ကရှင်းလင်းပြတ်သားစွာ အဆုံးအမ ပေးသနားတော်မှုခဲ့ပါ၏။ ...
"ပြဿဒါးနေ့ မှာ ထန်းလျက်ခဲကိုစားရင် မချိုဘူးလား"
"ချိုပါတယ် ဘုရား"

"ကုသိုလ်လုပ်ရင် ကုသိုလ် မဖြစ်ဘူးလား"
"ဖြစ်ပါတယ် ဘုရား"

"ကုသိုလ်ကံသည် အကျိုးပေးခွင့်ရသော်လည်း ပြဿဒါးနေ့ မှာ အကျိုးမပေးသေးဘဲ ဆိုင်းငံ့နေတယ်လို့ ဘုရားဟောပါသလား"
"မဟောပါ ဘုရား"

"ဒီလိုဆိုရင် ကံကောင်းထောက်ပံ့နေသောသူသည် ပြဿဒါးနေ့ မှ ဧည့်အိမ်တိုင်ထူခြင်းကြောင့် မကောင်းကျိုးကိုရဦးမှာလား"
"မရပါ ဘုရား"

"ကြောက်စရာမဟုတ်၊ အကုသိုလ်ကိုသာ ကြောက်ရမယ် မဟုတ်လား"
"မှန်ပါ့ ဘုရား"

"ဒီလိုဆိုရင်  ပြဿဒါးနေ့ က ကြောက်စရာမဟုတ်၊  အကုသိုလ်ကိုသာ ကြောက်ရမယ် မဟုတ်လား။ အဲဒါကြောင့် အကုသိုလ်ကိုမကြောက်ဘဲ  ပြဿဒါးကိုကြောက်လျှင်  ဗြဟ္မဏဘာသာ။ ပြဿဒါးကိုမကြောက်ဘဲ အကုသိုလ်ကိုကြောက်မှ ဗုဒ္ဓဘာသာလို့ မှတ်ကွဲ့"
                                                   ...................................
the eXistence မှ မင်းနန် (မော်ကျွန်း) ရေးသားပြုစုထားသော - "ဆရာတော်ကြီးများ၏ ဩဝါဒတော်များ" စာအုပ် (စာမျက်နှာ- ၁၈၂) မှကူးယူဖော်ပြခြင်း ဖြစ်ပါသည်။